ان لم تكن ذئبا بالت عليك الثعالب

ان لم تكن ذئبا بالت عليك الثعالب
ذيج السنة جان اكو رجل عنده ثلاث اولاد وحالته ميسوره عدهم حلال وزرع والله مغنيهم وكان عدهم جلاب تحرس بيوتهم وحلالهم ..يوم من الايام اجه واحد فات من يم بيوتهم نبحت عليه الجلاب اخونه ماگال باطل طلع مسدسه ورمه الجلب وكتله ..راحو الاولاد لبوهم وگلوله بويه ابن بيت فلان كتل جلبنه ولااجو ولااعتذرو...
گلهم ابوهم اكتلوا كتال الجلب
تعجبو الولد من حجي ابوهم وگلوله شنهي بويه نكتلنه بشر على مود جلب ؟؟ لا يبين انت كبرت وخرفت
مرت ايام على السالفه ولن حرامي يحوف حلالهم وياخذ ربع الحلال ويشرد ...رجعو الولد لبوهم وصاحو بويه حلالنه انباك ونوخذ ربعه گلهم ابوهم :اكتلو كتال الجلب
گالو _بويه شنهي انت مجلب بسالفة الجلب نكلك الحلال ؟
وهم مرت ايام على السالفه ولن احد الفلاليح يفوت على المحصول ويبوك منه واجو الولد لكو محصولهم ناقص راحو سولفو لبوهم رجع ابوهم وكلهم :اكتلو كتال الجلب !!
ضاجو الولد كلش وكالو ابونه خرف وبعد مانعتمد عليه
راحت ايام واجت ايام ولن يجي واحد ويخطف وحده من خواتهم ويشرد ركضو الولد لابوهم وهم رجع الاب عصب عليهم وكلهم مو كلتلكم اكتلو كتال الجلب
ذيج الساعه طلع ازغر الولد معصب واخذ سجينته وياه ولن يصادف كتال الجلب يلاكيه بالسوك هذا ماگال باطل لزمه وغرز السجينه بگلبه وكتله ...التمت الوادم وسالوه ليش كتلته كلهم هذا قبل ست اشهر كتل جلبنه واحنه جنه ضامينها اله وهسه اجت ساعتها
طش الخبر وسمع الزلمه الباك الحلال وصفن گال بويه ذووله على مود جلب كتلولهم بشر جا انه شيسون بيه؟؟ ولن ياخذ الحلال وعمامه ويفصل مربع ونفس الحاله مع الي باك المحصول هم اجه يرجف ورجع المحصول وفوكه غرامه وسمع الشخص الي خطف مره منهم وهم اجه فصل وجله من المنطقه كلها
ذيج الساعه فهمو الولد انه ابوهم كان يقصد لمن تسكت على تجاوز بسيط راح تنطي فرصه للاخرين يتجاوزون عليك وياخذون حقك لكن لو من البدايه يكون اكو حد لكل واحد محد يكدر عليك
مو دائما لازم نكون متسامحين
اتمنى تكون

وهم اكتلو كتال الجلب